Ответы
Су тасқыны - бұл қардың еруі, жауын-шашын, суды желмен айдаған және кептелу кезінде өзендердегі, көлдер мен теңіздердегі су деңгейінің көтерілуі нәтижесінде жерді айтарлықтай су басу. Өзендер арнасына суды желмен айдау арқылы болған су тасқыны ерекше түрге жатады. Су тасқыны көпірлер, жолдар, ғимараттар, құрылымдардың қирауына, елеулі материалдық шығынға, ал судың көп жиналуы (4 м/с астам) және су үлкен биіктікке көтерілсе (2 м көп) адамдар мен жануарлардың опат болуына әкеліп соқтырады. Қираудың негізгі себептері ғимараттар мен құрылымдарға су массасының, жоғары жылдамдықта жүзіп жүрген мұздардың, әртүрлі сынықтар мен жүзіп жүрген заттардың, т.б гидравликалық соққысы болуы мүмкін. Су тасқыны кенеттен пайда болып және бірнеше сағаттан 2-3 аптаға дейін созылуы мүмкін.
Су деңгейінің көтерілуі бірнеше факторларға байланысты, соның ішінде қардың еруінің уақыт көрсеткішіне, жауған жаңбырдың мөлшеріне, мұз құрсауының кептелісіне. Соған сәйкес алдын ала елді мекен, жеке аула ішінде қарды шығарып, арықтармен су жүретін құбырларды уақытылы қардан, қоқыстан тазарту қажет.
Су тасқынына қалай дайындалу керек
Егер де Сіздің аумағыңыз су тасқынынан жиі зардап шексе, су басу мүмкін жерлердің шекарасын, сондай-ақ тұрғылықты жеріңізге жақын тұрған дөңестеу сирек су басатын жерлерді, оған баратын ең қысқа жолды зерделеп, еске сақтаңыз.
Отбасы мүшелерін ұйымдасқан және жекелей көшіру кезінде әрекет ету, сонымен қатар кенеттен және буырқанып келе жатқан су тасқыны кезіндегі ережелерімен таныстырыңыз. Қайықтар, салдарды және оларды жасау үшін құрылыс матеиалдарын сақтау орындарын еске сақтаңыз. Көшіру кезінде алып шығатын құжаттар, мүлік және дәрі-дәрмектердің тізімін алдын-ала жасап қойыңыз. Арнайы чемодан немесе рюкзакқа құндылықтарды, қажетті жылы затарды, азық-түлік қорын, су және дәрі-дәрмекті салыңыз. Құжаттарды міндетті түрде су өткізбейтін пакетке орап алыңыз.
Су тасқыны кезіндегі алғашқы іс-әрекеттер мен көшірулер туралы
Көшірудің басталуы және тәртібі туралы жергілікті радиотрансляциялық желі бойынша және кез келген байланыс құралы арқылы жүзеге асырылады. Көшіруден бұрын, барлық азаматтар өз үйлерін қорғау бойынша жұмыстар жүргізу керек, атап айтқанда суды, электр қуатын, газды өшіру сияқты жұмыстарын жүргізу қажет. Көшіруге жататын тұрғындар, белгіленген уақытта жинау орнына өздерімен бірге құжаттарын, бірінші кезектегі керек заттарын, азық-түлік және ауыз су қорын, алғашқы медициналық көмек құралдарын ала келу керек. Су басу кезінде әрбір азамат өзін-өзі ұстап, көмек дер кезінде келетініне сеніп, құтқарушылардың талаптарын қатаң орындауы тиіс. Дүрбелеңге салынбай, айналасындағыларға үлгі көрсетуі керек.
Егер, Сіз су басу аймағында қалып қойсаңыз, ауыр киімдер мен аяқ киімдеріңізді шешіп тастап, жақын жердегі су баспаған учаскеге қарай жүзуіңіз керек. Бірақ ағынға қарсы жүруге болмайды. Судың астында қалған немесе судың үстінде қалқып жүрген заттардан жарақат алып қалмау үшін қорғану қажет. Ең негізгі және маңызды ережелердің бірі суға тиген азық-түліктерді және қайнамаған суды тамаққа қолданбау болып табылады. Суға тиген электрқондырғыларын қолдануға болмайды!