Ответы
Ответ:
Мемлекеттік тілдің тағдыры бүгінде көпшілікті көп толғандырып жүрген келелі мәселелердің бірі. Тәуелсіздік алғаннан бергі 20 жылдың ішінде тілге қатысты айтылған сөз де, істелген іс те, бөлінген қаржы да аз емес.
Бүгінде мемлекеттік тіл туралы көп айтылып, көз майын тауысып, жанарын жасытып жазып жүргендер де жетеді. Өйткені, мемлекеттік тіл елімізде аса маңызды да ең өзекті-тін. Тіл - қазақтың жан дүниесі, рухани негізі, ел еркіндігі мен ұлтты танытатын басты белгісі. Ол - ұлт болмысын ұғындырып, төңірегіне жұртты топтастырушы, біріктіруші фактор. Сондықтан мемлекеттік тілді білу - өмір талабы, заман сұранысы, қоғам қажеттілігі. Олай болса, тілді өмірдің барлық саласында қолданып, аясын кеңейту жолында әрбір қазақстандық өз азаматтық міндетін атқаруға тиіс. Ол үшін тіл білуді мақсат тұтып, алдына талап қоя, қажымай ізденіп, айрықша көңіл бөліп, аянбай еңбектенсе, мемлекеттік тілді меңгеретіні анық. Алайда, біздер үйреншікті сүрлеуден шыға алмай, сүйретіліп жүрген жайымыз бар.
Негізгі ұстаным - қазіргі заман талабына сай ұлттың ұлт болып жалғасын тауып отырған, тумысымыздан жанымызға сіңген тіліміздің қадір-қасиетін жеткізу, одан ой түю. Ешкімге жалтақтамай, бүгінгі бейбіт тірлігімізге, қол жеткізген Тәуелсіздігімізге, азаттық пен еркіндігіміз үшін жанын аямай алысқан мың-мыңдаған азаматтардың, қыршын жастайынан кеткен ұлтын сүйген ұландардың қайсарлығын мақтан етіп, қазақ топырағын дөп басып, емін-еркін өмір сүріп жатқан елімізде неге қазақша сөйлемеске! Қазіргі таңда мемлекеттік тілдің қызметте жандануы маңызды іс. Тілді білмейтін кейбір қызметкерлер бойында жетіспейтін бір кемшілікті жеңе отырып, алға жетелейтін сенімді серігі, мәңгі желбірейтін намыс туы - тілді білуге талаптануы, ынта білдіруі игі әрекет.